Juventus ចាញ់​ប្រកួត​ចុងក្រោយ​​ ខណៈ ​United ចាញ់ Valencia លើកដំបូងនៅ Champions League

Juventus បាន​ប្រកួត​បិទ​ពូល​H ទាំង​ជូរចត់​បន្ទាប់​ពី​ចាញ់​ក្រុម​បាត​តារាង​ Young Boys ដោយ​លទ្ធផល​ ១​ទល់​នឹង​២​កាល​ពី​យប់​មិញ។​

ក្រុម​រហស្សនាម​ថា​សេះ​បង្កង់​បាន​ផ្លាស់ប្ដូរ​ជម្រើស​ដំបូង​មួយ​ចំនួន​ចេញ​ប៉ុន្តែ​ខ្សែ​ប្រយុទ្ធ​សំខាន់​ដូចជា Mario Mandžukić និង​ Ronaldo នៅ​តែ​មាន​ឈ្មោះ​ក្នុង​បញ្ជី​១១​នាក់​របស់​លោក​ Allegri។ ជំនួប​នៅ​កីឡដ្ឋាន Suisse Wankdorf ម្ចាស់​ផ្ទះ​មាន​ឱកាស​ស៊ុត​២​គ្រាប់​ដោយ​ថ្វី​ជើង​កីឡាករ​ Hoarau ទាំង​ពីរ​នៅ​នាទី៣០ និង​៦៨។

Paulo Dybala ដែល​ប្ដូរ​ចូល​ជំនួស​ខ្សែ​ការពារ​ De Sciglio​ នោះ​បាន​ស៊ុត​ឲ្យ​ Juventus បាន​១​គ្រាប់​វិញ​នៅ​នាទី​៨០​ ហើយ​លទ្ធផល​២ ទល់នឹង​១​នេះ​គ្មាន​ការប្រែប្រួល​ទេ​ត្រូវ​រក្សា​រហូត​ដល់​ចប់​ការ​ប្រកួត។​ ទោះ​ចាញ់​មែន​តែ​ Juventus នៅ​តែ​ឈរ​លេខ​១​ដោយសារ​ Manchester United បាន​ចាញ់​ Valencia ២-១ ដូចគ្នា៕

Manchester United បានខកខានឱកាសបញ្ចប់ក្នុងចំណាត់ថ្នាក់លេខ១ក្នុងពូល H បន្ទាប់ពីចាញ់ Valencia នៅប្រកួតបិទពូល Champions League។​ នេះគឺជាបរាជ័យលើកដំបូងទល់នឹង Valencia របស់បិសាចក្រហមដោយ៧ប្រកួតកន្លងមកបិសាចក្រហមឈ្នះ២ ស្មើ៥ និងមិនដែលចាញ់សោះឡើយ។ ម្ចាស់ផ្ទះរកបានគ្រាប់ទី១នៅនាទី១៧ ស៊ុតបញ្ចូលទីដោយ Carlos Soler ហើយ១គ្រាប់ទៀតជាបាល់ចូលទីខ្លួនឯងរបស់ខ្សែការពារ Phil Jones។

ពូលនេះលេខមួយបានទៅលើ Juventus ដែលមាន១២ពិន្ទុនៅក្នុងដៃទោះចាញ់ Young Boy នៅប្រកួតចុងក្រោយក៏ដោយ ហើយ United ដែលចាញ់២ ឈ្នះ៣ និងស្មើ១ ឈរលេខពីរ ស្របពេលលេខបីគឺ Valencia បានទៅលេខពាន Europa League៕