Liverpool និង Arsenal នាំមុខក្នុងតារាង ខណៈ​ Man City ធ្លាក់មក​លេខ៣ ខណៈ ​Aguero ​ប្រកែក​តឹង​សរសៃ​ក​ជាមួយ Pep យប់មិញ​​

ការ​ប្រកួត​ក្នុងក្របខណ្ឌ Premier League សប្តាហ៍ទី២ យប់មិញ Liverpool និង Arsenal បាន​ទទួលជ័យជម្នះដូចគ្នា ខណៈ Manchester City បាន​ត្រឹមប្រកួតស្មើ Tottenham Hotspur ២-២។

Liverpool បានយកឈ្នះម្ចាស់ផ្ទះ Southampton ២-១ ក្នុងនោះ ២គ្រាប់របស់ហង្សក្រហមធ្វើបានដោយ Sadio Mane នាទី៤៥+ និង Roberto Firmino នាទី៧១។ រហូតដល់នាទី៨៣ ទើបម្ចាស់ផ្ទះបំបែកពងមាន់​បាន១គ្រាប់វិញធ្វើបានដោយ Danny Ings។ ចំណែក Arsenal យកឈ្នះក្រុមភ្ញៀវ Burnley ២-១។ Alexandre Lacazette រកគ្រាប់បាល់ដំបូងឱ្យក្រុមកាំភ្លើងធំនៅនាទី១៣ ប៉ុន្តែត្រូវក្រុមភ្ញៀវតាមស្មើនៅនាទី៤៣។ ចូលដល់នាទី៦៤ Pierre-Emerick Aubameyang រកបានគ្រាប់ទី២ ដែលជាគ្រាប់ជ័យជម្នះ​ឱ្យក្រុម​ម្ចាស់ផ្ទះ។

លទ្ធផលនេះ បាន​ធ្វើឱ្យ Liverpool និង Arsenal នាំមុខគេក្នុងតារាង​ជាបណ្តោះអាសន្ន​ដោយមាន ៦ពិន្ទុដូចគ្នា ខណៈ Man City ធ្លាក់មកលេខ៣ មាន​៤ពិន្ទុ ឯ Spurs ឡើងមកចំណាត់ថ្នាក់ទី៥វិញ មាន៤ពិន្ទុ​ផងដែរ៕

ក្រុម Man City ​លេងក្នុង​ដី​ខ្លួន​ឯង ​មិន​អាច​យក​ឈ្នះ​លើ​ក្រុម Spurs ​បាន​ឡើយ ដោយ​បាន​ត្រឹម​លទ្ធផល​ស្មើ​គ្នា ​២-២ ប៉ុណ្ណោះ។ ក្នុងការ​ប្រកួត​នេះ​ដែរ ក្រៅ​ពី​មាន​បញ្ហា​លើ​បច្ចេកទេស VAR ​គេ​នៅ​សង្កេត​ឃើញ​រឿង​មួយ​ទៀត​គឺ​ការ​ប្រកែក​គ្នា​រវាង​កីឡាករ Aguero ​និង Pep ​នៅ​នាទី​៦៦។

Aguero ​ត្រូវ​ប្ដូរ​ចេញ​ជំនួស​វិញ​ដោយ Jesus ​នៅ​នាទី​ខាង​លើ​នេះ។ ​ការ​ប្ដូរ​កីឡាករ​អាហ្សង់ទីន​ចេញ ​បាន​ធ្វើ​ឱ្យ​រូបគេ​មិន​ពេញ​ចិត្ត​នោះ​ទេ។ ​ការ​ដើរ​ចេញ​ពី​ទីលាន ​លោក Pep ​បាន​ហៅ Aguero ​មក​ណែនាំ ​ហើយ​ក៏​មាន​ការ​ប្រកែក​គ្នា​ពី​ចំណុច​ដែល​រូបគេ​ធ្វើ​មិន​បាន​ល្អ រហូត​ដល់​ត្រូវ​ប្ដូរ​ចេញ​នេះ។ ​Aguero​ ​ក៏​បាន​ស្រែក​ដាក់ Pep ​ដើម្បី​តវ៉ា​ការ​បន្ទោស​របស់​អ្នក​ចាត់ការ​ខ្លួន​ផង​ដែរ។ តែ​ចុង​ក្រោយ អ្នក​ទាំងពីរក៏បានអោបគ្នាវិញ ក្រោយពីគ្រាប់បាល់របស់ Jesus ស៊ុតចូលចុងម៉ោង។ ការសប្បាយចិត្តរបស់អ្នកទាំងពីរ គួរឱ្យសោកស្ដាយត្រង់ថា VAR មិនផ្ដល់​បាល់​១គ្រាប់របស់ Jesus ​នោះ​ទេ៕