Porto និង Celtic អត់បាន​កៅអី​ Champions League ទេឆ្នាំ​នេះ​ក្រោយ​ចាញ់​រៀងខ្លួន ខណៈ Ajax ប៊ិះ​ធ្លាក់​​

Celtic បាន​ធ្លាក់​ចេញ​ពី​ពាន UEFA Champions League ត្រឹម​វគ្គ​ជម្រុះ​ក្រោយ​លេង​ចាញ់​ក្រុម​ CFR Cluj មក​ពី​ប្រទេស​រូម៉ានី។​

កាល​ពី​ជើង​ទី​មួយ​​ក្រុម​ទាំង​ពីរ​បាន​ស្មើ​គ្នា​១-១ ប៉ុន្តែ​ជើង​ទីពីរ​នៅ​ទីក្រុង​ Glasgow ប្រទេស​ស្កុតឡែន​កាល​ពី​យប់​មិញ​ Celtic បែរ​ជា​ភ្លាត់​ចាញ់​ ៣​ទល់​នឹង​៤​នៅ​ទឹកដី​ខ្លួន​ឯង។​ Deac គឺ​ជា​អ្នក​ស៊ុត​បើក​ឆាក​ឲ្យ​ក្រុម​ភ្ញៀវ​នាំ​មុខ​១​គ្រាប់​មុន​នៅ នាទី​២៧​ ប៉ុន្តែ​ Forrest បាន​តាម​ស្មើ​ឲ្យ​ម្ចាស់​ផ្ទះ​ ១-១ វិញ​នៅ​នាទី​៥០ ហើយនៅ​នាទី​៦១ ខ្សែ​ប្រយុទ្ធ​ Edouard បាន​ស៊ុត​នាំ​មុខ​ឲ្យ​ Celtic វិញ​ម្ដង​ តែ​ក្រុម​ CFR Cluj តាម​ស្មើ​បាន​វិញ​ដោយ​បាល់​ប៉េណាល់ទី​របស់​ Omrani ​នៅ​នាទី​៧៤។ រំលង​២​នាទី​ Christie ជួយ​ក្រុម​ជើង​ឯក​ស្កុតឡែន​នាំ​មុខ​ម្ដង​ទៀត​ ប៉ុន្តែ​ Omrani ដដែល​បាន​តាម​ស្មើ​ ហើយ​នាទី​៩០+៧ Tucudean បាន​ស៊ុត​បិទ​គូថ​ឲ្យ CFR Cluj​ ឈ្នះ​ប្រកួត​នេះ។

​​​​

ក្រៅ​ពី​ Celtic ក្រុម​ Porto ឯណេះ​ក៏​មាន​វាសនា​មិន​ខុស​គ្នា​គឺ​បាន​ខ្ទាត​ចេញ​ពី​កម្មវិធី​ Champions League ត្រឹម​វគ្គ​ជម្រុះ​ក្រោយ​ចាញ់​ក្រុម​រុស្ស៊ី​ FC Krasnodar ដោយ​លទ្ធផល​ ២-៣។ កាល​ពី​ជើង​ទី​មួយ​នៅ​រុស្ស៊ី​ Porto បាន​ឈ្នះ​ Krasnodar ១-០ ក្រៅ​ទឹកដី​ប៉ុន្តែ​ការ​ប្រកួត​នៅ​ទឹកដី​ខ្លួន​ឯង​កាល​ពី​យប់​មិញ ក្រុម​ជើង​ឯក​ព័រទុយហ្គាល់​បែរ​ជា​ភ្លាត់​ចាញ់​ ២-៣​ ទៅ​វិញ​ធ្វើ​ឲ្យ​លទ្ធផល​ទាំង​ពីរ​ជើង​ ៣-៣ តែ​ Krasnodar បាន​ឡើង​ដោយ​គ្រាប់​ចំណេញ​ក្រៅ​ដី​ នេះ​គឺ​ជា​លើក​ដំបូង​គិត​ចាប់​ពី​ឆ្នាំ​ ២០១១​ ​មក​ដែល​ Porto មិន​បាន​ឡើង​ដល់​វគ្គ​ចែក​ពូល​ Champions League។

ដោយ​ឡែក​ Ajax ដែល​លក់​កីឡាករ​ខ្លាំង​ៗ​សឹង​អស់​នោះ​បាន​វាយ​បក​យក​ឈ្នះ​ PAOK របស់​ក្រិក​ដោយ​លទ្ធផល​ ៣-២ សរុប​ទាំង​ពីរ​ជើង​ ៥-៤៕